Атырау облысы Махамбет Өтемісұлы атындағы Атырау облыстық академиялық драма театрында көрнекті жазушы, драматург, Қазақстанның еңбек сіңірген қайраткері Рахымжан Отарбаевтың IV республикалық театр фетиваль-форумы өтуде.
Осы форумға «Аймақтағы әлеуметтік-экономикалық жобаларды іске асыру: жобалық тәсіл» атты семинардың тыңдаушыларыда қатысып, рухани кештің куәгерлері болды. Форумнан кейін Рахымжан Отарбаевтың «Бейбарыс сұлтан» драмасы сахналанды.
Дешті қыпшақ ұланы, он жасында жетім қалып, құлдыққа өзге елге сатылып кеткен Сұлтан аз-Захир Бейбарыс қатардағы құлдан Мысыр елінің ойлы да кемеңгер билеушісі дәрежесіне дейін көтерілген тағдыры өте күрделі, қарама-қайшылықты тұлға.
Қаншалықты биік атақ-даңқ пен аса зор билік әлеуетіне ие болса да Бейбарыс бабамыздың жүрегін мәңгілік бір сағыныш сыздатып өткен. Туған ел-жеріне, сайын даласына, жусанның ашқылтым иісіне деген сағынышы басым болды. Сұлтан Бейбарыстың өмірі суреттелетін осынау тарихи спектакльден тыңдаушылар рухани демалып, ақпарат алмасып қайтты.
